«مبارزه با تروریسم در افغانستان نیازمند فشار به پاکستان است»

با ادامه افزایش ناامنی در افغانستان، مقامات کشورهای آسیای میانه از گسترش عدم امنیت به مرزهای همسایگان افغانستان ابراز نگرانی کرده‌اند. خبرگزاری رویترز از قول یکی از نمایندگان دولت روسیه نوشت این کشور برنامه دارد دوباره نظارت بر امنیت مرزهای مشترک افغانستان با کشور تاجیکستان را بر عهده بگیرد.

روسیه یکی از بزرگ‌ترین پایگاه‌های نظامی خود را در مرز تاجیکستان برپا کرده است. بیش از هفت هزار سرباز روسی در پایگاه ۲۰۱ روسیه در تاجیکستان مستقر هستند. بر اساس قراردادی که سال ۲۰۰۵ با وجود نگرانی‌ها و مخالفت‌های برخی از نمایندگان دولت تاجیکستان به امضا رسید، فعالیت این پایگاه نظامی تا سال ۲۰۴۲ تمدید شد.

با افزایش نگرانی‌های کشورهای آسیای میانه، روسیه از تاجیکستان تقاضا کرده است که لجستیک پایگاه خود را با چرخبال‌های رزمی و ترابری تقویت کند.

عزیز بارز، دیپلمات سابق افغانستان که سال‌ها در تاجیکستان در مقام کنسول فعالیت کرده است در گفت‌وگو با رادیو زمانه می‌گوید تجربه‌های قبلی در افغانستان و عراق نشان داده که قدرت‌های بزرگ به بهانه کمک و تامین امنیت وارد خاک این کشورها شدند، اما در عمل منفعت‌های کلان خود را پیش بردند.

به اعتقاد عزیز بارز، با این که دولت تاجیکستان ترجیح می‌دهد از مرزهای خود با نظامیان محلی محافظت کند، وضعیت ناهموار و شکننده اقتصادی کشور ممکن است موجب استقبال دولت تاجیکستان از هر نوع کمک نظامی کشورهای دوست شود.

عزیز بارز می‌گوید بر اساس گزارش‌های منتشر نشده، دولت روسیه وعده کمک نظامی و تسلیحاتی به دولت افغانستان نیز داده است. او معتقد است که در ده دوازده سال گذشته تربیت نیروی جدید تروریستی در مرز پاکستان بالا گرفته است و مبارزه ریشه‌ای با تروریسم بدون تحت فشار قرار دادن دولت پاکستان و پاکسازی مرزهای این کشور از پایگاه‌های آموزشی طالبان و داعش همچنان ناموفق خواهد بود.

گفت‌وگو با عزیز بارز را در اینجا بشنوید: